Alla Vergine della Montagna

Supr’Asprumunti c’è ’na gran Signura,
Maria di la Muntagna eni chiamata:
pemmu l’arrivu jeu non vìju l’ura
e no’ mi stancu di la caminata.

Comu li nostri patri sonu e cantu
pecchì lu cori me’ eni cuntentu,
jeu no’ mi movu di ’stu locu santu
se no’ si poni fini o’ me turmentu.

E quandu a la me’ casa jeu ritornu
mi sentu veramenti ricriari
e pregu la Madonna notti e jornu
pe’ li me’ figghj e li perzuni cari.

Vergini bella, no’ m’abbandunati
ca li bisogni me’ vu’ li sapiti,
vògghju mu gridu forti ’nda li strati:
– Veniti genti cca e no’ ciangiti! –

Domenico Caruso