Satira a scopo etico del nostro tempo

di Domenico Caruso

Ahi, serva Italia!

Satira a scopo etico del nostro tempo

Ahi, serva Italia!

(Satira a scopo etico del nostro tempo:

“castīgat ridendo mores”)

«Ahi, serva Italia!», lu poeta dissi,

«su’ latri senza cori ‘i guvernanti»;

pe’ ttia non si càntanu cchjù Missi

ca’ no’ potìmu nu’ tirari avanti.

Cu’ s’arricchisci e cu’ mori di fami

pe’ curpa di politici e di ‘mpami.

O pòpulu c’aricchi già calati,

pecchì ti fai così sutta mentiri?

Rispìgghjati, su’ mali ‘ntenzionati

li vili, disonesti, gran vampiri;

sprèminu puru comu ‘nu limuni

lu Statu, la Regioni e lu Comuni.

Cacciàmu li ‘ncapaci e li furfanti

ch’alla rovina grandi ‘ndi portaru,

diversamenti no’ si vaci avanti

ca lu bon nomi già ‘ndi cancellaru.

Se ‘nda la porcheria simu a fundu,

non ha chi fari ‘u restu di lu mundu.

‘Nci su’ partiti, comu ‘i latri ‘i Pisa,

cu’ jornu si la fannu a litigari,

la notti po’ si spàscianu da rrisa

spartèndusi la rrobba e li dinari.

Amaru po’ cu’ cridi a li paroli

di cu’ sedìri o’ Parlamentu soli.

Li sacrifici di li vecchi patri,

li nostri casi chi stentammu a fari

forsi su’ ‘n manu ‘i ‘na banda di latri

chi voli ad ogni costu cumandari?

Ma datu ch’arrivammu già alla frutta,

facìmu nommu stamu sempri sutta.

Lu malu pagaturi ‘nd’approfitta

di chista società chi non si reggi

e se ccarcunu ‘na casa ‘nci affitta

chidu è patruni e non si vidi Leggi.

A cu’ prestò lavuru, a chistu modu,

‘i sordi ‘nci votaru arretu o’ codu.

Ricchi e pezzenti, schjetti e maritati,

veniti fora cu’ zzappi e vastuni,

la mala jerba prestu sradicati

mu la jettati sutta a li cafuni.

Sulu ‘ccussì, assemi a tuttu ‘u restu,

trova risposta lu parlari onestu.

Calabria bella, terra di sprendori,

torna lu mundu prestu a cumandari

ca l’ingordigia di li gran signori

i nostri figghi fici alluntanari:

l’onuri nostru fora ‘i cca portaru

pe’ la vergogna di cu’ li cacciaru.

Ma no’ facìmu tutti d’erbi ‘n fàsciu:

‘nci su’ perzuni degni di rispettu

chi ammenzu ‘a cumfusioni e lu sbalàsciu

‘nci sannu fari ‘nu pocu di nettu.

Nommu ‘ndi rassegnamu ‘a la sbentura

se nu’ volimu ‘na vita sicura.

Lu galantomu mu si faci avanti:

cu’ fidi lu votamu e cu’ speranza;

nommu tradisci e mu jesti festanti

pensandu ca po’ tratta cu’ arroganza.

Cu’ supra troppu va cadi soventi

senza mu si l’aspetta… comu nenti!

Lu me’ cunsìgghiu vògghju m’ascoltati:

cambiamu faccia a li vecchi partiti,

li giùvani capaci ora votati

ca simu stanchi di li vecchi riti.

Cu’ li paroli no’ si linchi panza

e si vien menu a la bona crianza.

A scienza fici passi da giganti,

‘u mundu ‘nda ‘nu pugnu si cogghìu

e se volìmu mu tiramu avanti

onuri ‘nu portamu a lu bon Diu

chi dissi, se ripètere è concessu:

«Rispetta ogni atru comu fai a te stessu!»

Domenico Caruso

S. Martino (R.C.)

redazione@approdonews.it